የኢትዮጵያ ብሔራዊ ምርጫ ቦርድ በቦርዱ የዕቅድ ዝግጅት፣ ክትትል እና ግምገማ የሥራ ክፍል አስተባባሪነት 45 ለሚሆኑ የቦርዱ የክልል ጽ/ቤት ኃላፊዎች፣ የዲፓርትመንት ኃላፊዎች እና ኤክስፐርቶች በዕቅድ ዝግጅት (Planning)፣በጀት አያያዝ (Budgeting)፣ ክትትል እና ግምገማ (Monitoring and Evaluation)፣ የአፈጻጸም ሪፖርት አዘገጃጀት (Reporting)፤የሠራተኛ ምዘና (Performance Evaluation and Coach for Performance) ላይ ያተኮረ ሥልጠና እየሠጠ ይገኛል፡፡

ከታህሣሥ 22 እስከ ታህሣሥ 25 ቀን 2016 ዓ.ም. ድረስ የሚቆየው ሥልጠና ዋና ዓላማ እያንዳንዱ ኃላፊ የሥራ ክፍሉን ተግባራት ለማቀድ፤በጀት ለመመደብ እና ደረጃውን የጠበቀ ሪፖርት ለማቅረብ የሚያስችለውን ዕዉቀት እና ክህሎት ለማስጨበጥ ያለመ ነው፡፡

የኢትዮጵያ ብሔራዊ ምርጫ ቦርድ በሕግ ከተሰጡት ኃላፊነቶች መሀከል መራጮች በቂ የምርጫ ነክ ግንዛቤ የሚያገኙበትን ስልት መቀየስና በተለያዩ የመገናኛ ዘዴዎች በመጠቀም የሥነ ዜጋና የመራጮች ትምህርትን መስጠት አንዱ ነው፡፡ በዚህም መሠረት የሥነ ዜጋና የመራጮች ትምህርትን በቋሚነት ተደራሽ ለማድረግ የተለያዩ የሕትመት ውጤቶችን በማዘጋጀት በትምህርት ተቋማት፣በህዝብ ቤተ- መጻሕፍት፣ መንግሥታዊ እና መንግሥታዊ ባልሆኑ ተቋማት ውስጥ በማስቀመጥ ለዜጎች ተደራሽ እያደረገ ይገኛል።

ከዚህ ቀደም ቦርዱን በሰብሳቢነት ሲመሩ የነበሩት ብርቱካን ሚደቅሳ ከነሐሴ 1 ቀን 2015 ዓ.ም ጀምሮ በገዛ ፈቃዳቸው ሥራቸውን መልቀቃቸው ተከትሎ የኢ.ፌ.ዲ.ሪ የሕዝብ ተወካዮች ምክር ቤት ዛሬ ባካሄደው 9ኛ መደበኛ ጉባኤ ወ/ሮ ሜላተወርቅ ኃይሉን የብሔራዊ ምርጫ ቦርድ ሰብሳቢ አድርጎ ሾሟል፡፡

ወ/ሮ ሜላተወርቅ ኃይሉ ቀደም ብሎም የኢትዮጵያ ብሔራዊ ምርጫ ቦርድ የጽሕፈት ቤት ኃላፊ በመሆን ከየካቲት 2012 ዓ.ም እስከ የካቲት 2015 ዓ.ም ማገልገላቸው ይታወቃል።

የኢትዮጵያ ብሔራዊ ምርጫ ቦርድ ከወዲሁ ለወ/ሮ ሜላተወርቅ ኃይሉ መልካም የሥራ ዘመን እንዲሆንላቸው ይመኛል፡፡

የኢትዮጵያ ብሔራዊ ምርጫ ቦርድ

ታህሣሥ 9 ቀን 2016 ዓ.ም.

የኢትዮጵያ ብሔራዊ ምርጫ ቦርድ ቀደም ብሎ በሰራው የፍላጎት ዳሰሳ ግኝት ላይ ተመስርቶ ያዘጋጀውን አራተኛ ዙር ሥልጠና ለምርጫ ቦርዱ የክልል ቅርጫፍ ጽ/ቤት ኃላፊዎች እና ሠራተኞች “ምርጫ ነክ አለመግባባቶችን በምርጫ ሕጉ መሠረት በሚፈቱበት ሂደት፤ በአማራጭ የክርክር አፈታት ሂደቶች፤ በምርጫ ወቅት በሴቶች ላይ በሚደርሱ ጥቃቶች እና በስርዓተ ጾታ እና አካታችነት” ርዕሰ ጉዳዮች ዙሪያ ለሶስት ቀናት የቆየ የአቅም ግንባታ ስልጠና ሰጥቷል፡፡

ከኀዳር 26 እስከ ኀዳር 28 ቀን 2016 ዓ.ም. ድረስ በቆየው ስልጠና ወደ 33 የሚደርሱ ከምርጫ ቦርድ የክልል ቅርጫፍ ጽ/ቤቶች የተውጣጡ የየቅርንጫፉ ጽ/ቤት ኃላፊዎች እና ሠራተኞች ተሳትፈዋል፡፡

ሥልጠናው ከምርጫ ቦርድ የሕግ፤ የፖለቲካ ፓርቲ ጉዳዮች እና የስርዓተ ጾታ የሥራ ክፍሎች ባለሙያዎች እና ከአጋር ድርጅቶች ጋር በመተባበር የተዘጋጀ ሲሆን በምርጫ ቦርድ የሥልጠና ሥራ ክፍል አስተባባሪነት እንዲሰጥ ተደርጓል፡፡

በኢትዮጵያ ብሔራዊ ምርጫ ቦርድ ከተለያዩ የሥራ ክፍሎች ለተውጣጡ ባለሙያዎች በዶክመንቴሽን፣ በሪከርድ እና መረጃ አስተዳደር ርዕሰ ጊዳዮች ላይ ከኢትዮጵያ ብሔራዊ ቤተ-መዛግብትና ቤተ-መጻሕፍት አገልግሎት በመጡ የዘርፉ ባለሙያዎች አማካኝነት ከ ጥቅምት 19 ቀን 2016 ዓ.ም. እስከ ጥቅምት 30 ቀን 2016 ዓ.ም. ድረስ የቆየ ስልጠና ተሰጥቷል።

አስር ቀን በቆየው ስልጠና በቦርዱ የሥራ ሂደት የሚሰበሰቡ ሪከርዶች ታሪካዊ ፋይዳቸው የላቀ በመሆኑ ሳይንሳዊ በሆነ ዘመናዊ የሪከርዶች አስተዳደር ስርዓት መደራጀት እና መጠበቅ እንዳለባቸው አፅንዖት ተሰጥቶታል፡፡

የኢትዮጵያ ብሔራዊ ምርጫ ቦርድ፤ በቦርዱ ማቋቋሚያ ዐዋጅ 1133/2011 በተሰጠው ሥልጣን መሠረት ጉዳዩ ከሚመለከታቸው ባለድርሻ አካላት ጋር በመመካከር የሥነ-ዜጋ እና የመራጮች ትምህርት እንደሚሰጥ እና እንደሚያስተባብር ይታወቃል። ይህውም መራጮች በቂ ምርጫ ነክ ግንዛቤ የሚያገኙባቸውን የተለያዩ አማራጮች በመጠቀም ማለትም በኅትመት ውጤቶች (በበራሪ ወረቀቶች፣ በቡክሌት፣ በብሮሸሮች እና በሌሎች አማራጮች) ግንዛቤ የሚፈጥሩ መልዕክቶችን በማዘጋጀት በትምህርት ተቋማት፣ በቤተ-መጻሕፍት እንዲሁም በመንግሥታዊና መንግሥታዊ ባልሆኑ ተቋማት ውስጥ በማስቀመጥ ለዜጎች ተደራሽ የማድረግ ሥራ ይሠራል። ቦርዱ ከላይ የተጠቀሰውን ኃላፊነት ለመወጣት በቦርዱ የሥነ-ዜጋና የመራጮች ትምህርት ክፍል አማካኝነት የግንዛቤ መስጫ ኅትመቶቹን በተለያዩ ቋንቋዎች እንዲሁም በብሬልም ጭምር እያዘጋጀ በማሠራጨት ላይ ይገኛል።