የኢትዮጵያ ብሔራዊ ምርጫ ቦርድ ዋና ሰብሳቢ ብርቱካን ሚደቅሳ ዛሬ መስከረም 20 ቀን 2014 ዓ.ም. በሐረሪ ክልል፣ በሶማሌ ክልል እና በደ/ብ/ብ/ሕ ክልል እየተካሄደ ያለው ምርጫ በሰላም እየተካሄደ እንደሆነ ለብዙኃን መገናኛ አካላት ገለጹ። ቦርዱ ከምርጫ ጣቢያዎች፣ ከምርጫ ክልሎች፤ ከተወዳዳሪ ፖለቲካ ፓርቲዎቸ እንዲሁም ከታዛቢዎች የሚመጡለትን ሪፖርቶች እየተቀበለ አፋጣኝ ምላሽ እየሰጠ እንዳለ የገለጹት ሰብሳቢዋ፤ ከነዚህም ውስጥ ሶማሌ ክልል ፊቅ ምርጫ ክልል የሚገኙ ጣቢያዎች የድምፅ መስጫ ወረቀቶቻቸው በውኃ በመበላሸታቸው ከመጠባበቂያ ላይ መጠቀማቸው፣ ሞያሌ ላይ ድኩቺ ምርጫ ጣቢያ ድምጽ አሰጣጥ ከመቋረጡ ውጪ መሰረታዊ የሆነ ችግር እንዳልገጠመ ገልጸዋል። እንዲሁም ዳውሮ ዞን የሲቪል ማህበራት ታዛቢ ለአጭር ጊዜ ታሥሮ የነበረ መሆኑ (አሁን ተፈቷል) ከቀረቡት ሪፖርቶች ውስጥ ተጠቃሽ ናቸው።

የኢትዮጵያ ብሔራዊ ምርጫ ቦርድ መስከረም 20 ቀን 2014 ዓ.ም. በሐረሪ ክልል፣ በሶማሌ ክልል እና በደ/ብ/ብ/ሕ ክልል ለሚያካሂደው ምርጫና ሕዝበ ውሣኔ፤ ለድምፅ መስጫና ለኦፕሬሽን ሥራዎች የሚያገለግሉ ቁሳቁሶችን ከማዕከል ወደ ምርጫ ክልሎች አሰራጭቶ አጠናቀቀ። ሥርጭቱ ዐርብ መስከረም 07 ቀን 2014 ዓ.ም. የተጀመረ ሲሆን ሐረሪ ክልል፣ ሶማሌ ክልል እና ደ/ብ/ብ/ሕ ክልል ላይ የሚሠራጩትን ቁሳቁሶች የጫኑ መኪኖች አዲስ አበባ ከሚገኘው የቦርዱ ጊዜያዊ መጋዘን መስከረም 11 ቀን 2014 ዓ.ም. ወደየጫኑበት ምርጫ ክልል ተንቀሳቅሰው ጨርሰዋል። በአዲስ አበባና ቅርብ አካባቢዎች ለሐረሪ ተወላጆች ለተከፈቱት ምርጫ ጣቢያዎች የሚሠራጩትን ቁሳቁሶች ደግሞ የድምፅ መስጫ ቁሳቁስ ወደ ምርጫ ጣቢያዎች መድረስ ያለበትን የጊዜ እርዝማኔ ከግምት ውስጥ ባስገባ መልኩ የሚጠናቀቅ ይሆናል።

የኢትዮጵያ ብሔራዊ ምርጫ ቦርድ አመራሮች ከጳግሜ 2 እስከ ጳግሜ 5 ቀን 2013 ዓ.ም. ባሉት ጊዜያት መስከረም 20 ቀን 2014 ዓ.ም. ምርጫ የሚካሄድባቸውን አካባቢዎች ማለትም ሶማሌ ክልል፣ ሐረሪ ክልል እና ደቡብ ብሔር ብሔረሰቦች እና ሕዝቦች ክልል የመስክ ጉብኝት እና ውይይቶችን አከናውነዋል። በቦርዱ ዋና ሰብሳቢ ብርቱካን ሚደቅሳ የተመራው ቡድን በደቡብ ብሔር ብሔረሰቦች እና ሕዝቦች ክልል መቀመጫ ከተማ ላይ የክልሉን ርዕሰ-መስተዳደር፣ የዞን አመራሮችንና በአካባቢው ላይ የሚወዳደሩ ፖለቲካ ፓርቲ ወኪሎችን አግኝቶ የመስከረም 20 ቀን 2014 ዓ.ም. ምርጫን የተመለከቱ አጠቃላይ የምክክር መድረክ አካሂዷል። ከድምጽ መስጫ ቀኑ በተጨማሪ በተመሳሳይ መስከረም 20 ለሚካሄደው ደቡብ ምእራብ ኢትዮጵያ ህዝበ ውሳኔ ውይይት ተደርጓል።

የኢትዮጵያ ብሔራዊ ምርጫ ቦርድ ነሐሴ 28 ቀን 2013 ዓ.ም ከኢትዮጵያ ብዙኃን መገናኛ ባለሥልጣን ጋር በመተባበር በመጪው መስከረም 20 ቀን 2014 ዓ.ም. ምርጫ በሚደረግባቸው አካባቢዎች ላይ ለሚወዳደሩ ፖለቲካ ፓርቲዎችና የግል ዕጩዎች የሚውለውን የነፃ ዐየር ሰዓት ድልድል አካሄደ። የዐየር ሰዓት ድልድሉ መመሪያውን መሠረት አድርጎ፤ በሶማሌ ክልል፣ በሐረሪ ክልል እና በደቡብ ብሔር ብሔረሰቦች እና ሕዝቦች ክልል ለሚወዳደሩ 22 የፖለቲካ ፓርቲዎችና 106 የግል ዕጩ ተወዳዳሪዎች የቀረበ ሲሆን፤ ይህውም በሦስት ሬዲዮ ጣቢያዎች፣ በአራት ቴሌቪዥንና በሁለት ጋዜጦች ላይ ተከናውኗል።