የኢትዮጵያ ብሔራዊ ምርጫ ቦርድ ሰኔ 7 ቀን 2016 ዓ.ም. ይፉ አድርጎ ያስጀመረውን የአምስት ዓመት ስትራቴጂያዊ ዕቅድ ስልታዊ ግቦች እና ዓላማዎች እንዲሳኩ በየደረጃው ያሉ የቦርዱ ሠራተኞችን ስለስትራቴጂያዊ ዕቅዱ ይዘት እና አተገባበር ግንዛቤ እንዲኖራቸው የሚያስችሉ የግንዛቤ ማስጨበጫ መድረኮች ተካሄዱ፡፡

የኢትዮጵያ ብሔራዊ ምርጫ ቦርድ የአምስት ዓመቱ ስትራቴጂያዊ እቅድ ስኬታማነቱ የሚረጋገጠው እያንዳንዳችን የቦርዱ ሠራተኞች እና ኃላፊዎች በምናበረክተው ጉልህ አስተዋፅኦ ነው ያሉት የኢትዮጵያ ብሔራዊ ምርጫ ቦርድ የቦርዱ ሰብሳቢ ወ/ሮ ሜላትወርቅ ኃይሉ ለስትራቴጂያዊ ዕቅዱ እውን መሆን አሁን እያሳያችሁት ያለውን ቁርጠኝነት አጠናክራችሁ እንድትቀጥሉ ይጠበቃል ብለዋል።

የኢትዮጵያ ብሔራዊ ምርጫ ቦርድ የቴክኒክ ቡድን አዋቅሮ አንድ ዓመት በወሰደ ጊዜ ያስጠናውን የፆታዊ ትንኮሳ ፓሊሲ እና የማስተግበሪያ ሥነ-ሥርዓት (procedure) በፌደራል እና በክልል ለሚሰሩ የቦርዱ ጏላፊዎችና ሠራተኞች የግንዛቤ ማስጨበጫ አውደ ጥናት አስተዋወቀ።

በአውደ ጥናቱ በዋንኛነት የፆታዊ ትንኮሳ ፓሊሲ እና የማስተግበሪያ ሥነ-ሥርዓት አስፈላጊነት፣ የፆታዊ ትንኮሳ ባህሪያት እና መገለጫዎች፣ የፆታዊ ትንኮሳ ክስ የሚቀርብበት ሥነ-ሥርዓት፣ የፓሊሲው የተፈፃሚነት ወሰን እና ፆታዊ ትንኮሳ በሚያስከትለው ችግሮች ላይ ገለፃ ተሰጥቶ ሰፊ ውይይት ተደርጓል።

የተባበሩት መንግስታት የልማት ፕሮገራም /United Nations Development Program-UNDP /ለምርጫ ቦርድ በሚሰጠው የ(SEEDS2) ፕሮጀክት ድጋፍ እኤአ በ2025 ዓመት ሊሠሩ የታሰቡ ሥራዎችን ለማቀድ በተካሄደው አውደ ጥናት ላይ ከቦርዱ የተለያዩ የሥራ ክፍሎች የተውጣጡ የሥራ ክፍል ኃላፊዎች ተሳትፈዋል፡፡ የአውደ ጥናቱ ዋና ዓላማም የቦርዱ ሥራ ክፍሎች ከUNDP (SEEDS2)ፕሮጀክት የሚያገኟቸውን ድጋፎች ተከትሎ የሚሠሯቸውን ሥራዎች በተገቢው መንገድ እንዲያቅዱ ማስቻል እና የምርጫ ቦርድን የሥራ ዕቅድና የዕቅድ አፈፃፃም ተቋማዊ አቅምን ለማሳደግ ያለመ ነበር፡፡

የኢትዮጽያ ብሔራዊ ምርጫ ቦርድ፤ የጋምቤላ ብሔራዊ ዲሞክራሲያዊ ንቅናቄ (ጋ.ብ.ዲ.ን) በኢትዮጽያ የምርጫ፣ የፓለቲካ ፓርቲዎች ምዝገባና የምርጫ ሥነ-ምግባር ዐዋጁ ቁጥር 1162/2011 አንቀጽ 78 (1(ሀ፣ለ)፣4) እንዲሁም አንቀጽ 79(1) ላይ የተመለከቱትን ድንጋጌዎች በመጣሱና በቂ መከላከያም ባለማቅረቡ፤ ቦርዱ በዐዋጁ አንቀጽ 68(7) በተሰጠው ሥልጣን መሠረት አንቀጽ 98 (1(ሠ))ን ጠቅሶ ፓርቲው መሠረዙን ያሳወቀበት ደብዳቤ ከታች ተያይዟል።

እዚህ ላይ ይጫኑ

የኢትዮጽያ ብሔራዊ ምርጫ ቦርድ ዛሬ ታኅሣሥ 7 ቀን 2017 ዓ.ም. በሥራ ላይ ያለው “የኢትዮጵያ የምርጫ፣ የፓለቲካ ፓርቲዎች ምዝገባና የምርጫ ሥነ-ምግባር ዐዋጅ ቁጥር 1162/2011” የተመለከተ የሕግ ማሻሻያ ዐውደ ጥናት አካሄደ።

አምስቱም የቦርድ አመራር አባላት፣ የየሥራ ክፍል ኃላፊዎችና ከፍተኛ ባለሞያዎች እንዲሁም የቦርዱ የቅርንጫፍ ጽ/ቤት ኃላፊዎች የተገኙበትን ዐውደ-ጥናት በንግግር የከፈቱት የቦርዱ ሰብሳቢ የሆኑት ሜላትወርቅ ኃይሉ ሲሆኑ፤ በንግግራቸውም ስድስተኛው ሀገር ዐቀፍ ምርጫን ተከትሎ ከባለድርሻ አካላት ጋር በተካሄዱ የድኅረ-ምርጫ መልካም ተሞክሮዎችና ተግዳሮቶች ግምገማ መድረክ ላይ የተነሡትን የሕግ ማሻሻያ የሚፈልጉ ዐዋጁ ላይ ያሉ ድንጋጌዎች ፤ ከሰባተኛው ሀገራዊ ምርጫ ቀደም ብሎ በመለየት፤ ዓለም ዐቀፍ መመዘኛዎችን ባማከለና የተሻለ አፈጻጸምና ግልጸኝነትን ለማጎልበት እንዲረዳ ተደርጎ ማሻሻያ እንደተደረገበት ተናግረዋል።

የኢትዮጵያ ብሔራዊ ምርጫ ቦርድ በሰኔ13 ቀን 2013 ዓ.ም. እና መስከረም 20 ቀን 2014 ዓ.ም. 6ኛውን ሀገር አቀፍ ምርጫ ማካሄድ በማይቻልባቸው ምክንያቶች ምርጫ ሳያካሂዱ በቀሩት በቤንሻንጉል-ጉሙዝ፣ አፋር፣ ማዕከላዊ ኢትዮጵያ እና ሶማሌ ክልሎች የተካሄዱ የቀሪና ድጋሚ ምርጫዎች እንዳይስተጓጓሉ ድጋፍና ክትትል እንዲያደርጉ በኢትዮጵያ ብሔራዊ ምርጫ ቦርድ ተዋቅረው፤ ስምሪት ተሰጥቷቸው የነበሩ 27 የክትትል ቡድኖችን የሥራ አፈፃፀም ሪፓርት የተገመገመበት መድረክ አካሄደ።

በመርሃ ግብሩ የማጠቃለያ ሥነ-ሥርዓት ላይ ንግግር ያደረጉት የኢትዮጵያ ብሔራዊ ምርጫ ቦርድ ሰብሳቢ ወ/ሮ ሜላትወርቅ ኃይሉ የክትትል (Monitoring) ቡድን አደራጅተን ማሰማራት ከጀመርን ጊዜ አንስቶ የቦርዱ ምርጫ የማስፈፀም ዋነኛ ተልዕኳችን አይነተኛ መሻሻል አምጥቷል፤ በሂደቱም አሠራሮቻችንን ዳግም ለመፈተሽ በርካታ ትምህርቶችን መቅሰም ችለናል ብለዋል።

የኢትዮጵያ ብሔራዊ ምርጫ ቦርድ ከአሜሪካ ሰብአዊ ተራድኦ-የምርጫ እና የፓለቲካ ሂደቶችን የሚያጠናክሩ የተለያዩ ድርጅቶች ጥምረት (USAID/CEPPS) እና ከአውሮፓ ህብረት-የአውሮፓ ምርጫ ነክ ሥራዎች ድጋፍ ማዕከል (EU/ECES) ጋር የኢትዮጵያን የምርጫ ሥርዓት ሂደት ለማሻሻል የተደረጉ ድጋፎች ያስገኙትን ጠቀሜታ እና በቀጣይ ሊሰጡ በሚገቡ የድጋፍ ማዕቀፎች ዙሪያ ከተቋማቱ አስተባባሪ አካላት ጋር ውይይት አደረገ፡፡ የውይይቱ ዋነኛ ትኩረት ቀደም ሲል በልማት አጋሮቹ ሲሰጥ ለነበረው ድጋፍ እውቅና ለመስጠት እና በቀጣይም አጋዥ ተቋማቱ ድጋፋቸውን አጠናክረው እንዲቀጥሉ ለማበረታታት የተዘጋጀ የውይይት መድረክ ነው።

የኢትዮጵያ ብሔራዊ ምርጫ ቦርድ የተባበሩት መንግስታት የልማት ፕሮግራም (UNDP) SEEDS ፕሮጀክት ያስገኘውን እና እያስገኘ ያለውን ፋይዳና ጠቀሜታ አስመልክቶ ከ UNDP SEEDS ፕሮጀክት አስተባባሪ አካላት፣ ከተለያዩ ሀገራት አምባሳደሮች እና ከልማት አጋር ድርጅቶች ተወካዮች ጋር ውይይት አደረገ።

የውይይቱ ዋነኛ ትኩረት ቀደም ሲል ለነበረው ድጋፍ እውቅና ለመስጠት እና ለነባር የ SEEDS ፕሮጀክት እና አዳዲስ አጋሮች ምርጫ ቦርድን እንዲደግፉ ለማበረታታት እና ስለ ምርጫ ቦርድ እድገት እና የትኩረት አቅጣጫዎች ለአጋር ድርጅቶች ለማስረዳት ያለመ ነበር።

በኢትዮጵያ የምርጫ፣ የፓለቲካ ፖርቲዎች ምዝገባና የምርጫ ሥነ-ምግባር አዋጅ ቁጥር 1162/2011 መሠረት ቦርዱ ለፓለቲካ ፓርቲዎች እያደረገ ያለው የማበረታቻ ድጎማ ከአካታችነት አንፃር ለታለመለት ዓላማ መዋሉን እና ያስገኘውን ውጤት ለመገምገም የሚያስችል በአማካሪ ባለሙያ በተጠና የዳሰሳ ጥናት ላይ የእውቅና (Validation workshop) አውደጥናት አካሄደ።

የኢትዮጵያ ብሔራዊ ምርጫ ቦርድ ጥቅምት 11 ቀን 2017 ዓ.ም. ከጠቅላላ ጉባዔ፣ ከኦዲትና በሴት አባላት ቁጥር አማካኝነት ከሚገኝ የገንዘብ ድጋፍ ጋር በተገናኘ 11 ፓርቲዎች ላይ የዕግድ ውሣኔ ማሳለፉ ይታወቃል። ቦርዱ ከታገዱት ፓርቲዎች ውስጥ የይቅርታና የመከላከያ መልስ ያቀረቡትን አምስት ፓርቲዎች ጉዳይ መርምሮ፤ ፓርቲዎቹ ያለፈውን ስህተት እንደማይደግሙና በቀጣይም በሚያቀርቧቸው መረጃዎች ጥራት በመተማመን እንዲሁም የቦርዱን ሥራ ከሚያደናቅፍና ዕምነት ጥያቄ ውስጥ ከሚከቱ ተግባራት ተቆጥበው በሕግ አግባብ ብቻ እንደሚንቀሳቀሱ በማመን፤ በማስጠንቀቂያ ዕግዱን ያነሣ መሆኑን ያሳውቃል።